Mic 5 | NdeIBE | STEP | Hlomisa amabutho akho, wena dolobho lamabutho, ngoba sesivinjezelwe. Bazatshaya umbusi wako-Israyeli esihlathini ngomqwayi.

Micah 5

Umbusi Othenjisiweyo Ovela EBhethilehema

1 Hlomisa amabutho akho, wena dolobho lamabutho, ngoba sesivinjezelwe. Bazatshaya umbusi wako-Israyeli esihlathini ngomqwayi.

2 “Kodwa wena Bhethilehema Efratha, lanxa umncinyane phakathi kwezizwana zakoJuda, kuwe ngizavelelwa ngozakuba ngumbusi wako-Israyeli, omdabuko wakhe ngowasekadeni, kusukela ezikhathini zendulo.”

3 Ngakho u-Israyeli uzadelwa kuze kube yisikhathi sokuthi lowo ohelelwayo abelethe, laba abafowabo bonke baphenduke ukuzahlangana labako-Israyeli.

4 Uzakuma eluse umhlambi wakhe ngamandla kaJehova, ngobukhosi bebizo likaJehova uNkulunkulu wakhe. Bazahlala ngokuvikeleka, ngoba lapho udumo lwakhe luzafika emikhawulweni yomhlaba.

5 Uzakuba yikuthula kwabo.

Ukukhululwa Lokuchithwa

Lapho um-Asiriya ehlasela ilizwe lethu edabula phakathi kwezinqaba zethu, sizamvusela abelusi abayisikhombisa, kanye labakhokheli babantu abaficamibili.

6 Bazabusa ilizwe lase-Asiriya ngenkemba, ilizwe likaNimrodi behlome ngenkemba, uzasikhulula kum-Asiriya lapho ehlasela ilizwe lethu engena phakathi kwemingcele yethu.

7 Insalela zabakoJakhobe zizakuba phakathi kwezizwe ezinengi njengamazolo avela kuJehova, lanjengemkhizo phezu kotshani, okungalindeli muntu kumbe kuhlalele abantu.

8 Insalela zabakoJakhobe zizakuba phakathi kwezizwe, phakathi kwabantu abanengi, njengesilwane phakathi kwezinyamazana zegusu, lanjengeguqa lesilwane phakathi komhlambi wezimvu, esidlithizayo sidabule ekuhambeni kwaso, kungekho ongahlenga.

9 Isandla sakho sizaphakanyiselwa phezulu ngokunqoba izitha zakho, njalo zonke izitha zakho zizachithwa.

10 “Ngalolosuku,” kutsho uJehova, “ngizabhubhisa amabhiza enu phakathi kwenu ngibhidlize lezinqola zenu zempi.

11 Ngizachitha amadolobho elizwe lenu ngibhidlize lezinqaba zenu zonke.

12 Ngizachitha ubuthakathi benu njalo kalisayikukhunkula futhi.

13 Ngizachitha izithombe zenu ezabazwayo lamatshe enu okukhonza phakathi kwenu; kalisayi kuwukhothamela futhi umsebenzi wezandla zenu.

14 Ngizasiphula phakathi kwenu izinsika zenu zika-Ashera, ngidilize lamadolobho enu.

15 Ngizaphindisela ngentukuthelo langolaka ezizweni ezingangilalelanga.”